[h1]Nesër në Shipol të Mitrovicës do të bëhet rivarrimi i 11 martirëve të kombit[/h1]
Mitrovicë, 26 dhjetor - Nesër më 27 dhjetor do të bëhet rivarrimi i 11 martirëve të kombit, të vrarë gjatë luftës më 1999 nga kriminelët serbë. Mbetjet e tyre mortore janë gjetur në oborrin e Xhamisë së Haxhi Veselit dhe në disa lokacione të tjera të komunës së Mitrovicës, të cilat janë identifikuar në morgun e Rahovecit. Janë identifikuar: Arife Sylë Vatovci (1923); Ajshe Jusuf Xheladini (1923); Beqir Milazim Hajra (1955); Muhamet Ismail Ibra 91968); Hysnije Ibrahim Morina (1930); Qamil Salihu (1928); Sylë Fekë Nimani (1907); Hanife Rrahim Deliu (1912); Malush Adem Spahiu; Hajdar Mehmet Pllana dhe Shaban Bahtir Kalludra. Rivarrimi i të ndjerëve do të bëhet në orën 13:00, në varrezat e martirëve në Shipol. Në shenjë nderimi dhe respekti për 11 martirët e kombit, kryetari i ri i Kuvendit të Komunës, Bajram Rexhepi, ditën e enjtë e ka shpallur ditë zie në komunën e Mitrovicës.
