Der Visa Skandal wird jetzt auch in Albanischen Zeitungen detailiert geschildert. siehe auch aktuellen Spiegel.
Sipas DW, shqiptarët paguanin 2 mijë euro për të marrë një vizë shengen, në Ambasadën Gjermane në Tiranë
Parlamenti gjerman hetim për vizat e Ambasadës në Tiranë
A.Bogdani
TIRANË- Vizat e parregullta, të dhëna nga Ambasada Gjermane në Tiranë janë kthyer në temë debati për arenën politike gjermane. Krahas ambasadës në Tiranë, objekt debatesh janë bërë edhe ambasadat gjermane në Rusi dhe Ukrainë, ndaj edhe opozita kristiandemokrate e kristiansocialiste ka vendosur të ngrejë një komision hetimor për këtë çështje. Sipas lajmit të publikuar nga DW, ky komision do të hetojë lidhur me praktikën e ndjekur në Shqipëri, për dhënien e vizave të parregullta gjermane. Historia e dhënies së vizave të parregullta nga Ambasada Gjermane, e njohur me termin “kriminalitet vizash” ka filluar më 23 maj të këtij viti. Në këtë ditë, në Bari të Italisë janë kapur dy persona të cilët udhëtonin me viza të lëshuara nga Ambasada Gjermane në Tiranë. Ata kanë deklaruar se ishin të ftuar në një panair fiktiv në Mynih, me emrin “Bau und Dach”, që në shqip do të thotë “ndërtim dhe çati”. Pas këtij rasti, autoritetet gjermane kanë kapur edhe 200 raste të tjera, ku personat shqiptarë udhëtonin në drejtim të Gjermanisë me viza të parregullta.
Trafiku i vizave
Sipas lajmit të publikuar nga DW, formularët fiktivë janë plotësuar në Shqipëri. Mediat gjermane i janë referuar të dhënave të policisë, duke shtuar se në Tiranë qarkullonin mbi 600 formularë të tillë bosh. Për çdo vizë të tillë të parregullt, qytetarët shqiptarë paguanin deri në 2000 euro. Për skandalin e pasaportave të lëshuara nga kjo ambasadë nuk janë përfshirë vetëm punonjësit shqiptarë, por edhe nëpunësit gjermanë të ambasadës. Ish-konsulli i ambasadës, Tomas Veg, dhe dy punonjës të tjerë gjermanë janë duke u hetuar nga Prokuroria e Berlinit, për dhënie në kundërshtim me ligjin të vizave gjermane. Sipas burimeve të mësipërme, vetëm dy javë më parë, Ministria e Jashtme gjermane ka nxjerrë një dekret për ashpërsimin e rregullave të dhënies së vizave jo vetëm në Tiranë, por edhe në vendet e tjera të botës.
Bllokimi
Ambasada Gjermane në Tiranë, vetëm pak muaj më parë bllokoi një seri vizash “Schengen” të dhëna nga ish- konsulli i saj në Shqipëri, Tomas Veg. Ambasada vendosi njerëz të vetët në kufi, për të shënuar mbi vizat gjermane shënimin e bllokimit. Kjo gjë ndodhi pas debateve të ashpra në politikën gjermane, për dhënie të vizave në kundërshtim me procedurat ligjore, por edhe pas kontrolleve të bëra në ambasadë, lidhur me dokumentacionin që shoqëronte dhënien e vizave shengen. Lidhur me të ashtuquajturin skandal të vizave gjermane, një pjesë e madhe e personelit të ambasadës në Tiranë është shkarkuar, pasi dyshohet për implikim të mundshëm. Ndër ta është edhe ish-konsulli Tomas Veg, i cili është nën hetim nga Prokuroria e Berlinit. Ambasada gjermane në Tiranë është përfolur edhe më parë për dhënie vizash personave të dyshimtë, kur u zbulua se Orik Shyti, Altin Arapi si dhe anëtarë të tjerë të organizatës “Hakmarrja për Drejtësi” kishin marrë viza nga kjo ambasadë në vitin 2002. Edhe persona të tjerë me probleme në Shqipëri kanë marrë viza të tilla, ndërkohë që qytetarëve të thjeshtë që kërkonin viza u është mohuar kjo gjë.
VIZAT
200 raste vizash të parregullta,
të zbuluara nga autoritetet gjermane
600 formularë falsë në Tiranë
2000 euro për një vizë të parregullt
3 persona të hetuar në Gjermani,
mes të cilëve edhe ish-konsulli
11/11/2004
KATEGORIA: Kronikë nga Tirana
http://www.shekulli.com.al/index.ph...97&PHPSESSID=2596a4e3447899303ff5bab25d12d961
