Reportazh: Si e priti familja e Ismet Jasharit - Komandant Kumanovës lirimin e çlirimtarëve nga Gjykata e Hagës
Dashtë Zoti që ky gëzim që erdhi me lirimin e vëllait tonë Fatmirit, të na sjellë edhe gëzimin e shumëpritur, idealin e dëshmorëve të kombit, të gjithë luftëtarëve të lirisë dhe gjithë shqiptarëve, pavarësinë e plotë të Kosovës. Mendoj se Fatmir Limaj ia çeli rrugën Kosovës drejt krijimit të shtetit. Do të mbahet mend në histori emri i Çelikut, sepse ai është definitivisht lajmëtari i lirisë së Kosovës”, ka thënë për “Epokën e re”, Xhemajl Jashari, vëllai i Ismet Jasharit - Komandant Kumanovës
Kumanovë, dhjetor - Lirimi i Komandant Çelikut është pritur me gëzim të madh në të gjitha trojet shqiptare. Një nga familjet emblematike e cila ka dhënë shumë për çlirimin e Kosovës, është edhe familja e Ismet Jasharit - Komandant Kumanovës, heroit tonë kombëtar të cilin me Fatmirin e bashkoi ideali dhe lufta e shenjtë për liri. Burgosja e padrejtë e Fatmirit e ka brengosur këtë familje njëlloj si shumë familje tjera shqiptare që dinë të respektojnë vlerat e luftës. Madje, Jasharajt e Orizares janë ndjerë edhe më të prekur, sepse Komandant Çelikun e donin dhe respektonin si të ishte i biri i tyre. Dhe ata që janë ndjerë më të prekur, sigurisht që do të ndiheshin edhe më të gëzuar kur më në fund ngadhënjen e drejta dhe Fatmiri lirohet si i pafajshëm. Duke qenë të vetëdijshëm se familja e Komandant Kumanovës e priti me ngazëllim të veçantë lirimin e Fatmirit, menjëherë pas lirimit të tij, “Epoka e re” vizitoi familjen e Ismet Jasharit, në fshatin Orizare të Kumanovës. Shkuam te Jasharajt e Kumanovës që t’i përgëzojmë për lirimin e Fatmirit, sepse e dinim se e prisnin ardhjen tonë. Familja Jashari na priti me gëzim të madh dhe na uroi mirëseardhje në kullën e tyre në fshatin e lindjes të Ismet Jasharit, në Orizare. Në hyrje të fshatit qëndronte krenar busti i Ismet Jasharit dhe valëviteshin flamujt kombëtarë shqiptarë. Ismeti i derdhur në bronz dukej më krenar se kurrë më parë. Në dyer të shtëpisë na uron mirëseardhje baci Xhemajl dhe motrat e Ismetit. I përgëzojmë për lirimin e bashkëluftëtarit të vëllait të tyre, Fatmirit. Te Jasharajt shihen lotët e gëzimit në sytë e motrave të Ismetit, të cilat nuk dinin se si ta shprehin gëzimin e madh të tyre. Mësojmë se Xhemajli (vëllai i Ismet Jasharit) kur u lirua Fatmiri, mezi ka pritur të zbardhë dita e nesërme që të shkojë ta vizitojë atë në Banjë të Malishevës.
Barije Jashari Zymberi: Kam dashur të nisem në këmbë për në Kosovë
Gëzimin për lirimin e Fatmir Limajt, nuk mund ta fshihte as motra më e madhe e Komandant Kumanovës, Barija. Ajo disa herë përsëriti se Fatmir Limajn e Haxhi Shalën-Topin i kemi vëllezër. Dhe jo vetëm këta por të gjithë bashkëluftëtarët e Ismetit. Vëllai im Ismeti, vazhdon rrëfimin motra e tij, prej Zvicrës bashkë me Fatmirin janë nisur për në front, kanë ardhur bashkë prej Zvicre krah për krahu të dy kanë luftuar andaj nuk mund ta dalloj Fatmirin nga vëllezërit e mi. Ai është vëllai jonë!
“Gjatë tërë kohës e kemi përcjellë në Hagë gjykimin, dhe kur më në fund u shpall pafajësia dhe morëm vesh se po lirohet Fatmiri... u ndiem njerëzit më të lumtur në botë. Kjo ishte për ne e papritura më e këndshme, sepse nuk kemi besuar se do ta lirojnë Fatmirin, por kur u lirua, besomëni se desha të nisem në këmbë për në Kosovë që ta pres vëllain tim Fatmirin”, thotë Barija.
Ndërkaq, se si e ka përjetuar familja e Jasharajve në Orizare, lirimin e bashkëluftëtarit të Komandant Kumanovës, Fatmir Limajt, Xhemajl Jashari thotë se “30 nëntori i këtij viti ishte një ditë shumë emocionale për mua personalisht, dhe për tërë familjen Jashari. Siç e dini atë ditë pritej edhe shpallja e aktgjykimit në Tribunalin e Hagës. Natyrisht se ne familja e Komandantit Ismet Jasharit-Kumanova e kemi përcjellë me shumë kujdes dhe emocione seancën nëpërmjet RTK-së dhe në momentin kur është shpallur pafajësia e vëllait tonë Fatmir Limajt, në familjen tonë ka shpërthyer një gëzim i veçantë që nuk e besoj se mund të përsëritet. Me shumë emocione e kemi pritur vendimin e Tribunalit. Ndërkaq, kur e kam takuar Fatmirin më është dukur si ta kisha takuar vëllain tim, Ismetin”, shprehet Xhemajli.
Ai më tej vazhdon të tregojë se nuk e ka besuar se do të vijë deri te lirimi i Fatmirit. “Shumë jam frikësuar se do të marrin dënime drakonike vëllezërit tanë të Ushtrisë Çlirimtare të Kosovës. Kam pasur shumë skepticizëm se prokuroria do të mundohet të balancojë duke i dënuar. Por t’u them edhe diçka tjetër, shumë sinqerisht në vetvete duke e njohur pastërtinë dhe luftën që e ka bë Fatmir Limaj me shokë, e kam pasur një parandjenjë se do të shpallet i pafajshëm. Dhe faleminderit prej Zotit që Fatmir Limaj u kthye në Kosovë ashtu si deshëm ne. Më vjen mirë që drejtësia e vlerësoi luftën e drejtë të UÇK-së sepse lufta jonë ka qenë e shenjtë, e drejtë, me shumë sakrifica”, thotë ai.
Xhemajl Jashari tregon se i kanë përcjellë të gjitha seancat e Tribunalit të Hagës, duke iu falënderuar RTK-së dhe televizioneve lokale shqiptare në Kumanovë. “Në seancat gjyqësore, Fatmiri së pari mbrojti Fatmir Limajn në mënyrë të denjë, po në veçanti ai e mbrojti në mënyrë të shkëlqyeshme dhe dinjitoze të mirënjohurin Komandant Çelikun, me këtë dua të them se e mbrojti luftën për liri të Ushtrisë Çlirimtare të Kosovës, politikën e saj shumë dinjitoze dhe parimore. Më duhet ta them nga thellësia e zemrës sime se Fatmir Limaj e mbrojti në mënyrë të denjë gjithë popullin shqiptar në Hagë”, shprehet ai.
Kurse, për dënimin e Haradin Balajt, Xhemajli thotë se shqiptimi i dënimit, ndaj Haradinit gjithsesi se është i padrejtë, por se familja Jashari dhe ai personalisht besojnë dhe shpresojnë se në shkallën e dytë edhe Haradin Balës do t’i jepet pafajësia, sepse janë arrestuar pa të drejtë dhe janë mbajtur 33 muaj në paraburgim në Tribunalin e Hagës.
Xhemajl Jashari shton se lirimi i Fatmir Limajt erdhi në kohën më të duhur për popullin e Kosovës, kur Kosova e pret çastin më të rëndësishëm dhe vendimtar të saj. “Dashtë Zoti që ky gëzim që erdhi me lirimin e vëllait tonë Fatmirit, të na sjellë edhe gëzimin e shumëpritur, idealin e dëshmorëve të kombit, të gjithë luftëtarëve të lirisë dhe gjithë shqiptarëve, pavarësinë e plotë të Kosovës. Mendoj se Fatmir Limaj ia çeli rrugën Kosovës drejt krijimit të shtetit. Do të mbahet mend në histori emri i Çelikut, sepse ai është definitivisht lajmëtari i lirisë së Kosovës”, thotë për “Epokën e re”, Xhemajl Jashari, vëllai i Ismet Jasharit - Komandant Kumanovës.
Shkëlzen Aqifi
Arsim Sinani
