[TABLE="class: all-content-table, width: 950"]
[TR]
[TD="class: all-content-table-td-1, align: left"]
Американски орден за генерал-потполковник Стојановски
Нато интеграција | 22. јуни 2011 - 14:11
Началникот на генералштабот на Армијата Мирослав Стојановски денес од страна на американскиот амбасадор Филип Рикер беше одликуван со орден „Легија на заслуги“.
Стојановски испрати порака дека Македонија нема време за експерименти.
- Се наоѓаме во интензивни реформски процеси, мора веднаш да се продолжи со напорна работа од причини што секаков застој или успорување на реформските процеси ќе значи враќање не само на Армијата, туку и на институциите во Македонија, назад, изјави по добивањето на орденот, во Домот на АРМ во Скопје, началникот на ГШ на АРМ.
АРМ и МО, подвлече тој, во делот на програмата за членство, ги исполнува критериумите на Алијансата.
- Во овие услови какви што се сметам дека со човечкиот потенцијал што го имавме постигнавме скоро максимум. За да се постигнат подобри успеси треба и поголеми инвестиции во институцијата. Тоа не е ништо ново. Сепак, работата не е завршена, ниту еден реформски процес не завршува, постојано продолжува. Ако и тука застанат реформите, тогаш ќе се постават и други прашања кога се работи за Акцискиот план за членство на Република Македонија во НАТО, предупреди генерал-потполковник Стојановски.
Амбасадорот Рикер истакна дека на генерал Стојановски на овој начин директно му се дава признание за придонесот и развојот на професионална и способна македонска Армија.
- Во изминативе шест години генерал Стојановски ја водеше Армијата низ брзи реформи, брз процес на трансформација кој подобро ја подготви Македонија за членство во НАТО. Со негова поддршка и насоки, Армијата на Република Македонија застана рамо до рамо со САД и останатите во Ирак и Авганистан, нагласи Рикер.
[/TD]
[/TR]
[/TABLE]
