Komuna e Prishtinës merr masa disiplinore ndaj punëtores së padisiplinuar
Publikuar: 01.03.2013 - 11:37
Prishtinë, 1 mars - Komuna e Prishtinës, përkatësisht Drejtoria e Administratës, duke u bazuar në Ligjin për Shërbimin Civil të Republikës së Kosovës, ka marrë vendim të premten që t’ia paraqesë Komisionit Disiplinor punëtoren e Sektorit për Shërbimin me Qytetarë, me arsyen se ajo nuk e ka respektuar vendin e punës. Shkas për gjithë këtë ishte xhirimi i saj nga një qytetar, me të cilin përmes Interaktivit denoncoi shkeljen e disiplinës së punës.
Komuna njofton qytetarët se punëtorja në fjalë është ndëshkuar edhe për mosrespektim të vendimit të Komunës për mos konsumim të duhanit në ambientet e komunës, përkatësisht vendet publike në të gjitha ndërtesat e Komunës së Prishtinës, si dhe është ndëshkuar me heqje të mëditjes ditore nga paga e saj mujore, transmetoi qik-u.
Përmes një deklarate Komuna e Prishtinës po ashtu thekson se do të respektojë çdo vendim që do të nxjerrë Komisioni disiplinor në raport me këtë rast dhe do t’i marrë të gjitha masat, konform rekomandimeve që do të vijnë nga ky komision.
Komuna e Prishtinës, përveç dy objekteve të saja qendrore, njëri në qendër të qytetit dhe tjetri në Lagjen Arbëria, ku ofrohen shërbime për qytetarë, po ashtu ka edhe 5 qendra tjera në pesë Lagje të ndryshme të qytetit, si dhe 33 Bashkësi Lokale, ku po ashtu ofrohen shërbime të ndryshme për qytetarë.
Komuna e Prishtinës, u benë thirrje të gjithë qytetarëve që për çfarëdo pakënaqësie apo moskryerje të detyrave si duhet nga shërbyesit civile, t’i paraqesin ankesat e tyre në Kutitë e Ankesave, që janë të vendosura në çdo objekt të Komunës së Prishtinës. Vetëm një bashkëpunim i mirë në mes të Komunës, qytetarëve dhe shoqërisë civile do të bëjë të mundur realizimin e qëllimit tonë të përbashkët për përmirësimin dhe ofrimin sa me cilësore të shërbimeve komunale.
Komuna e Prishtinës merr masa disiplinore ndaj punëtores së padisiplinuar - Lajme - Koha Net