Krasniqi merr premtime për njohje të reja
Nga Express më 06.02.2010 në ora 18:13
Kryeparlamentari Jakup Krasniqi, deklaroi sot pas kthimit nga vizita në Britani, se gjatë takimeve me përfaqësues të shteteve të ndryshme gjatë punimeve të Konferencës Ndërkombëtare Parlamentare mbi Ndërtimin e Paqes, ka marrë premtime për njohjen e Kosovës nga disa vende, të cilat nuk e kanë bërë ende një gjë të tillë.
Delegacioni i Kuvendit të Kosovës, i kryesuar nga kryetari Krasniqi, në përbërje të të cilit ishin edhe Ibrahim Gashi, anëtar i Kryesisë; Mehmet Hajrizi, shef i Kabinetit të Kryeparlamentarit dhe Skënder Reçica, këshilltar për Marrëdhënie me Jashtë, gjatë punimeve të Konferencës, e cila u mbajt në Londër dhe në Belafst, ka pasur takime me udhëheqës të lartë të Parlamenteve të Mbretërisë së Bashkuar dhe të Irlandës.
Krasniqi tha të ketë marrë zotimin e përfaqësueseve parlamentar të vendeve pjesëmarrëse në këtë konferencë, për ndikim te qeveritë e tyre për njohje të vendit.
“Konfirmimet shpesh herë janë të lehta, por kemi marrë premtime. Këta ishin përfaqësues të deputetëve dhe ju e dini se nga shumica e këtyre vendeve parlamente nuk e kanë kushedi çfarë ndikimi, ndikimet më të mëdha i kanë presidenti dhe kryeministri. Por, megjithatë ata u zotuan se do të ndikojnë te qeveritë e tyre që të kenë parasysh njohjen e Kosovës”, ka thënë Krasniqi, transmeton KosovaPress.
Gjatë takimeve me përfaqësues të parlamenteve të Bangladeshit, Pakistanit, Sudanit dhe Malajzisë, sipas Krasniqit, mes të tjerash është biseduar edhe për procesin e njohjes së Kosovës, të cilën deri më tash e kanë pranuar 65 vende të botës.
Ai gjithashtu shtoi se ka kërkuar nga Britania e Madhe mbështetje për strategjinë për integrimin e veriut në shoqërinë kosovare, si dhe mbështetje të tjera në institucione të BE-së. “Unë i kam njoftuar edhe për përpjekjet, për strategjinë në mënyrë të veçantë pasi është një përpjekje e Qeverisë së Kosovës, e institucioneve të Kosovës dhe ICO-së. Natyrisht kam kërkuar jo vetëm mbështetje për strategjinë, por edhe mbështetje tjera nga Britania në institucionet e Bashkimit Evropian”, ka thënë kryetari i Kuvendit.
Gazeta Express