PD mbyll fushatën, Berisha: Së bashku drejt Evropës
Partia Demokratike mbylli sot me një miting në shesin “Nënë Tereza” në Tiranë, fushatën elektorale për zgjedhjet vendore të 8 majit.
Në fjalën e tij, kryeministri Sali Berisha i ka kërkuar të gjithë shqiptarëve të votojnë alternativën e djathtë, si e vetmja sipas tij që hap rrugën e Evropës. Në veçanti, kreu i qeverisë ftoi qytetarët e Tiranës t’i japin votën Lulzim Bashës, kandidatit të koalicionit “Aleanca për Qytetarin”.
“Ju bëtë realitet ëndrrën shekullore të lëvizjes së lirë, bëtë që Shqipëria të jetë destinacioni turistik i globit. Sot, secili prej nesh ka vetëm një ëndërr, Tiranën e zhvilluar, Shqipërinë e zhvilluar, Tiranën evropiane, Shqipërinë evropiane. Vota për Lulzim Bashën është vota për të ndërtuar së bashku Tiranën jeshile, Tiranën e shëndetit”, tha Berisha.
Duke theksuar se zgjedhjet e ditës së diel vulosin të ardhmen e vendit, numri një i ekzekutivit kërkoi nga të gjithë shqiptarët që të mbajnë së bashku zgjedhjet më të lira dhe më të ndershme në histori. “Le të shkojmë në këto zgjedhje që mbahen në ditën e ngadhënjimit të lirisë dhe vlerave, në ditën e zotimeve tona ndaj vlerave. Le të nderojmë miqtë tanë që na mbështetën, të vulosim të ardhmen tonë me votën e lirë”, shtoi kryeministri.
Ndërkohë, kandidati i maxhorancës për Bashkinë e Tiranës, Lulzim Basha, premtoi se në krye të Bashkisë do t’i kthejë Tiranës shpresën e munguar, vendet e reja të punës, investimet dhe zhvillimin, ndërsa shtoi se për t’u bërë të mundura këto, duhet të largohet kryebashkiaku aktual Edi Rama.
Sipas Bashës, kryetari aktual nuk dëgjon zërin e qytetarit, por vetëm çirret. “Tiranën e preka dhe e ndjeva në çdo qelizë, në çdo pasion, në çdo ëndërr të thjeshtë dhe të hapur. Tirana, kjo zonjë e rëndë që shumë herë ka njohur edhe mosmirënjohjen, është kthyer në qëllim të madh të jetës sime. Tirana ka nevojë për shumë dashuri”, tha Basha.
“Përjetova një rizgjim të ëndrrave të mia më të forta, larg qytetarëve kam fshirë edhe ndonjë lot të hidhur - vijoi -. Tirana nuk ka nevojë për lot dhe britma, Tirana ka nevojë për të rinjtë dhe të rejat e shkolluara, të bindur dhe idealistë. Shkova në çdo derë, për të dëgjuar shqetësimet. Askush nuk mund të drejtojë pa dëgjuar. Kjo është ndarja mes kandidatit që ju dëgjon dhe atij që çirret e dëgjon vetëm zërin e tij”.
Në vazhdim të akuzave ndaj Ramës, Basha theksoi se kryebashkiaku i tanishëm nuk merr përsipër të krijojë vende të reja pune dhe nga ana tjetër, siç tha Basha, ka si qëllim luftën politike e bllokimin e projekteve për qytetarin. “Kam premtuar dhe do hap vende të reja punë, Unazën e Tiranës, investime të reja. Rama thotë se nuk është detyra e tij për vende punë, kurse për mua vendet e punës për ju, janë prioriteti numër një. Unaza e Re çliron trafikun, Rama është kundër saj sepse refuzon të bashkëpunojë me kundërshtarët politikë, duke e mbajtur këtë projekt peng. Kryetari Rama nge duart përpjetë për çmimet, kurse unë mendoj se ai duhet të jetë i pari në krye të punëve dhe përgjegjësive të veta”, përfundoi Basha.
Gazeta Start: PD mbyll fushatën, Berisha: Së bashku drejt Evropës
