Diskutim publik për planin rregullues të lagjes ”Qyteza Pejton”
Publikuar: Sot, më 21 korrik 2010
Prishtinë, 21 korrik - Komuna e Prishtinës ka bërë të mërkurën hapjen e diskutimit publik të Planit rregullues për lagjen ”Qyteza Pejton” të kryeqytetit. Në këtë diskutim të pranishëm kanë qenë edhe kryetari i Prishtinës, Isa Mustafa, udhëheqsja e Drejtorisë së Urbanizimit, Luljeta Sokoli-Çeku, si dhe përgjegjësit e Kompanisë ”Art Dizajn” të cilët kanë hartuar planin rregullues për lagjen ”Qyteza Pejton”.
Zyra për marrëdhënie me publikun e Komunës së Prishtinës bën të ditur se Isa Mustafa, duke ju drejtuar të pranishmeve, ka kërkuar nga të gjithë ofrimin e kontributit në pasurimin dhe zgjerimin e planit ekzistues. “Ju duhet të kontribuoni me sugjerimet dhe rekomandimet e juaja që plani të jetë në përputhje me pritjet dhe kërkesat e juaja” ka thënë kryetari Mustafa.
Ai është shprehur që puna në hartimin e planeve rregulluese duhet të bëhet në atë mënyrë që të mundësojë zbatim praktik në terren. “Planet duhet t’i përmbajnë elementet dhe kriteret që kërkohen dhe kjo të mundësoj zbatim praktikë, ngase kemi hasur në vështirësi në zbatimin e disa planeve rregulluese, shkaku i ekzagjerimeve të panevojshme”, ka potencuar Mustafa.
Ndërsa udhëheqsja e Drejtorisë së Urbanizimit, Luljeta Sokoli-Çeku, ka shprehur bindjen që periudha prej një viti sa ka zgjatur hartimi i planit rregullues për këtë lagje ka rezultuar me nxjerrjen e një plani të përshtatshëm për banorët e lagjes si dhe për kryeqytetin.
“Kemi arritur të ruajmë bërthamën e krijimit të lagjes dhe në bazë të planit ajo lagje do të shndërrohet në një zonë të biznesit, banimit, hotelerisë dhe konsujve” ka thënë Luljeta Sokoli-Çeku.
Ndryshe plani rregullues për lagjen “Pejton” do të mbetet i hapur për diskutim për një muaj rresht dhe gjatë kësaj kohe qytetarët do të mund të afrojnë sugjerimet dhe rekomandimet e tyre në lidhje me përmbajtjen finale që duhet të këtë një plan i tillë.
Komuna - Koha Net
