Në Makofc mblidhen vullnetarë për luftën në Siri
Shumë qytetarë nga Kosova po udhëtojnë drejt Damaskut për t’u rreshtuar në anën e kryengritësve sirianë në luftë kundër presidentit Bashar Al - Assad.
Një raport i organeve të sigurisë së Kosovës thotë se në një xhami në Makofc të Prishtinës dhe në Mitrovicë qytetarët mblidhen dhe rekrutohen për të luftuar në anën e kryengritësve në Siri.
“Një xhami e cila është e ndërtuar në fshatin Makofc të komunës së Prishtinës e cila është ndërtuar në salafi frekuentohet nga persona të cilët mund të jenë rekrutë të ardhshëm në luftën e Sirisë”, thuhet në këtë raport të siguruar nga Klan Kosova, transmeton Kosovapress.
Arsim Krasniqi, kryetar i Lëvizjes Bashkohu, i cili edhe e ka dhënë tokën për ndërtimin e xhamisë në Makofc e mohon këtë mundësi. Por ai i mbështetë ata që po kapin armët kundër regjimit të presidentit Assad.
“Nuk është e vërtetë, ata shkojnë me vetë dëshirë dhe nuk mblidhen me grupacione, kjo është normale, që mundohen me e ndërru kahen vetëm pse jem myslimanë”, tha Krasniqi.
Raporti tregon se shqiptarët shkojnë në Siri në grupe të vogla ndërsa sipas tij janë dy pika ku bëhet grumbullimi i atyre që shkojnë tu ndihmojnë vëllezërve sirianë, njëra në Prishtinë dhe tjetra në Mitrovicë. /Telegrafi/
