Коце ќе копа тунел од 900 метри во центарот на Скопје
Објавено: 12.10.2011 13:52 | Прочитано: 2057 | Печати |
Изградбата на подземна сообраќајница која треба да го растовари сообраќајот во централното градско подрачје, по долги години зборување, конечно се стави во процедура. Освен од Градската власт, проектот финансиски ќе биде поддржан и од Владата која ќе учествува со две третини од вкупната вредност на изградбата на подземната сообраќајница, за која како првични информации се спомeнува сума од 30 милиони евра. Покрај петте милиони евра обезбедени од обврзници, останатиот дел Градот ќе го финансира од буџетот. Следува процедура за изработка на проект и тендер за избор на изведувач, а стартот на изградбата се предвидува да биде во 2013 година.
За таа цел, градскиот Совет денеска ја усвои одлуката да се задолжи со општински обврзници по пат на јавна понуда, во висина од пет милиони евра.
Според најновата верзија на проектот, подземната сообраќајница ќе ги поврзува булеварот Кузман Јосифовски – Питу со булеварите Илинден и Партизански одреди. Предвидени се и два кружни тека каде што ќе се понира и излегува од подземната сообраќајница, кај мостот „Гоце Делчев“ и на почетокот на булеварот Кузман Јосифовски Питу, во близина на Мостот кај МАНУ. Изградбата на подземната сообраќајница треба да овозможи и директна врска помеѓу источниот и западниот дел од градот, растоварување на сообраќајот во Малиот и Големиот ринг, бидејќи за патување од источниот во западниот дел на Градот, возачите нема да бидат принудени да ги користат улиците во централното градско подрачје.
Тунелот ќе биде во должина од 900 метри и профил од 14 метри. Предвидено е да биде опремен со систем за детекција на инциденти, систем за детекција на пожар, систем за видео надзор, комуникациски систем за корисниците и итните служби, С.О.С. станици, систем за вентилација, знаци со променлива содржина и бариери, а ќе биде управуван од контролен центар.
Борче Георгиевски, советник од ВМРО ДПМНЕ го поддржа проектот и истакна дека Градот за првпат обезбедува средства преку издавање на хартии од вредност, што укажувало на добрата финансиска состојба на Градската власт.
- Градот не должи никому во моментот, а има околу 10 милиони евра на располагање, што зборува за домаќинското работење на градоначалникот. За првпат гласаме за проект за подземна сообраќајница, како вистинско решение за сите метрополи, а искуството ќе може да се искористи за реализација на втората подземна сообраќајница, што треба да понира под Скопското кале кон касарната „Гоце Делчев“ - истакна тој.
Дел од трасата на подземната сообраќајница не е според ГУП-от. Се чека да се усвои Детален урбанистички план од општина Центар, кој опфаќа еден крак од сообраќајницата. По усвојувањето на ДУП-от, ќе почне подготовка на тендерска документација за проект, што би тараело околу осум месеци, па потоа ќе следува тендер за изведувач.
Иако одлуката се усвои, опозициските советници се скептични околу задолжувањето, бидејќи сметаат дека за обврзниците најзаинтересирани ќе бидат банките со кои Владата соработува и со кои таа неколкукратно се обврзала преку обврзници.
- Земи, вети камата, врати, повторно земи па плати камата и така на неколку пати во две години или три, па пресметајте колкава камата би било вкупно. И по онаа народната „И волкот сит и овците на број“, ама го нема овчарот. И банките сити и Градот задоволен, ама некој треба да плати, односно сите ние. Поделен товар помалку тежи, па макар и финансиски - истакна Драги Давчевски, советник од СДСМ.
