АНТИКОРУПЦИСКА ПОТВРДИ
Прекршочна за Црвенковски, криел имот на Корчула и во Белград!
Кривична одговорност е побарана и за Андреј Петров поради злоупотреба и непријавување на средства за изборна кампања
Прекршочна за Црвенков�ки, криел имот на Корчула и во Белград!
Бранко Црвенковски не пријавил имот на Корчула и во Белград, иако бил должен да го стори тоа, и затоа ќе одговара прекршочно и ќе биде известена Управата за јавни приходи, која дополнително ќе треба да го оданочи имотот, информираа вчера од Антикорупциска комисија.
Станува збор за имот од 395 квадратни метри на островот Корчула, стан од 77 квадратни метри во Белград и земјиште како и девизна заштеда од 26 илјади американски долари и 20 илјади германски марки кои неговата сопруга ги наследила, а не биле пријавени во анкетниот лист на Црвенковски.
Според Законот за спречувањето корупцијата за Црвенковски е предвидена казна во висина од 500 до 1.000 евра додека УЈП може да го оданочи овој имот со стапка од 70 отсто од вредноста доколку лидерот на СДСМ не докаже дека имотот бил стекнат како резултат на примања што се пријавени и оданочени.
- Бранко Црвенковски, во периодот кога беше премиер и претседател, го прекршил Законот за антикорупција, бил должен да ги пријави сите промени во неговиот недвижен имот и имотот на неговата сопруга, па затоа може да се иницираат две постапки, поднесок до надлежен прекршочен суд и барање за прекршочна постапка, рече Воислав Зафировски, претседател на Антикорупциска.
Истрага на Антикорупциска, која почнала во мај минатата година, покажала дека имотот кој е на име на сопругата на Црвенковски го нема во анкетните листови па поради тоа тие побарале дополнителна информација од српските и хрватските власти кои потврдиле дека имаат регистрирано недвижен имот и девизни заштеди на името на Јасмина Црвенковска, но под моминското презиме.
- Само еднаш Црвенковски има поднесено известување на промена на имотна состојба - дека патничко возило марка полоо е отуѓено и дека има купено џип марка гранд чирокии во вредност од 1,3 милиони денари притоа земајќи кредит од Комерцијална банка, додаде Зафировски.
Во врска со парламентарните избори Антикорупциска соопшти дека од Јавното обвинителство ќе побара кривично гонење на Андреј Петров, организатор на изборната кампања на СДСМ. Тој ќе треба да одговара за повеќе дела како злоупотреба на средства од изборна кампања, непријавување и спречување на надзор како и неподнесување на задолжителниот финансиски извештај.
- До Јавното обвинителство поднесовме иницијатива поведување кривична одговорност против Андреј Петров, овластено лице, организатор на изборна кампања на политичката партија СДСМ, поради сомнение за злоупотреба на средства од изборна кампања. Петров со непријавување на извор на финансии, со спречување на надзор и неподнесување на финансиски извештај и користење недозволени средства за изборна кампања го злоупотребил овластувањето кое му било дадено , изјави претседателот на Антикорупциската комисија, Воислав Зафировски.
Двајцата управници пак ќе треба да одговараат и за давање на лажни и непотполни информации околу донациите и обезбедените средства за изборната кампања.
Зафировски истакна дека според законот тајните донирања се санкционираат со парична или затворска казна.
СДСМ вчера веднаш реагираше на наводите на Антикорупциска и најави кривични пријави за злоупотреба на службената положба и овластувања против претседателот и членовите на антикорупциска.
- Антикорупциската комисија за нас повеќе не претставува државен орган и нема никаков кредибилитет да соопштува било што во јавноста. Членовите на комисијата кои се платени со парите на сите граѓани и земаат високи плати, единствено се машина за производство на лаги наменети за оцрнување на сите оние кои ќе го срушат од власт Никола Груевски и ВМРО-ДПМНЕ
Затоа денес најавуваме дека СДСМ ќе поднесе кривични пријави за свесна злоупотреба на службената положба и овластување, изјави Петров. (О.Ч.)
Судиите да си останат судии
Антикорупциска открила случаи во кои судии и јавни обвинители паралелно работеле и како универзитетски професори и членувале во управни одбори на фирми и институции.
- Цениме дека професијата судија и јавен обвинител е многу авторитетна и моќна општествена позиција. Ангажманот на универзитетите не значи ништо друго, туку зголемена моќ, што значи и судир на интереси, изјави Зафировски.
Поради тоа од Комисијата најавија дека ќе сугерираат до Републичкиот суски совет и Советот на јавни обвинители да ги преиспитаат барањата и дозволите за дополнителна дејност на судиите
Претседателот на Антикорупциска најави дека до 2015 година се предвидува измена на законските решенија со кои нема да се остави предност за вршење дополнителна дејност на судиите.
Астрономски сметки за гориво и телефони
Двајцата поранешни директори на Агенцијата за цивилна воздушна пловидба, Ернад Фејзулаху и Зоран Крстевски, со соочуваат со кривични пријави поради утврдени неправилности во нивното работење.
Ревизорските извештаи покажале дека биле плаќани големи суми на пари за гориво и мобилни телефони, но и дека биле спроведувани јавни набавки спортивно од законот.
Така во извештајот стои дека во една година Агенцијата платила 2,7 милиони денари за сметки за службени мобилни телефони и 5 милиони денари за гориво. Покрај тоа за сума од 5 милиони деднари биле купени два автомобила од фирма која воопшто не учествувала на јавниот тендер а во спорни јавни набавки биле потрошени 15 милиони денари.
Поради тоа Антикорупциска побарала Обвинителството против нив да поднесе кривични пријави за злоупотреба на службената положба и овластувања и за несовессно работење.
Студентски дом - златна кокошка за директорите
Тројца поранешни директори на студентскиот дом "Пелагонија", исто така, се најдоа на тапет на Антикорупциска поради финансиските малверзации тешки десетици милиони денари. Тие вршела набавки во четири очи од блиски фирми, плаќале неколку пати повисоки суми за набавената стока и издавале простории под закуп за смешна кирија. Штетата која била предизвикана Комисијата ја проценила на над 20 милиони денари.
Станува збор за Азем Садики, Исмалил Абази и Бујар Муртезани, кои ќе одговараат за несовесно работење и за злоупотреба на службената положба и овластувања.
Kandidat
