Trepça synon fitore kundër Prishtinës së tronditur
Publikuar: Sot, më 20 mars 2010
Prishtinë, 20 mars - Trajnerit të Trepçës, Pance Milevski, nuk i interesojnë problemet me të cilat po përballet Sigal Prishtina. Ai synon që t'i prijë skuadrës së tij drejt fitores kundër kampiones në fuqi. Trepça pret Prishtinën të shtunën (sot) nga ora 17:00 në palestrën "Minatori", në derbin e javës së parafundit (27) të stinorit të rregullt të Technomarket Superligës së Kosovës në basketboll. Nga skuadra e Prishtinës të enjten mbrëma ka dhënë dorëheqjen trajneri Arben Krasniqi.
"Do të jetë ndeshje e vështirë, derbi i vërtetë. Ne synojmë fitore dhe do të japim maksimumin për të arritur këtë. Nuk na interesojnë punët e Prishtinës. Ne i shikojmë punët tona dhe jemi koncentruar maksimalisht për të vazhduar serinë e fitoreve", ka thënë të premten trajneri i Trepçës, maqedonasi Pance Milevski.
Trepça është e dyta në klasifikim me 47 pikë, një më pak se liderja Prishtina dhe dy më shumë se Bashkimi që është i treti. Trepça tashmë ka siguruar pozitën e dytë, nga e cila edhe do të startojë në plejof. Trepça këtë edicion kundër Sigal Prishtinës ka realizuar dy fitore e një humbje.
Prishtina pas fitores së realizuar të enjten kundër Pejës ka siguruar pozitën e parë. Ekipi i kaltër ka një takim më pak të luajtur kundër Bambit. Në xhiron e fundit pret Dritën e Gjilanit.
"Ne e kemi siguruar pozitën e parë dhe nuk do të jetë ndonjë dëm i madh edhe nëse mposhtemi nga Trepça. Gjithsesi do të jetë takim shumë i fortë. Ne do të japim maksimumin për të marrë fitore", ka thënë kapiteni i Sigal Prishtinës Edmond Azemi. Sipas tij, Prishtina në Mitrovicë do të udhëtojë pa qendrën Blerim Mazreku që të enjten ka udhëtuar në Katar për t’u provuar në një skuadër të atjeshme.
Të shtunën zhvillohet edhe ndeshja në mes Bashkimit e Kosovës së Vushtrrisë. Dy ndeshjet e tjera të javës së 27-të, Drita - Bambi e Peja - Kolegji Eurosporti, në program janë të dielën.
Orari i ndeshjeve:
E shtunë
Trepça - Sigal Prishtina (17.00)
Bashkimi - Kosova (19.30)
E diel
Drita - Bambi (14.00)
Peja - Kolegji Eurosporti (19.00)
Trepca-Sigal Prishtina heute ab 17Uhr auf KTV.
